Cabrera Uhartediko parke nazionala
| Cabrera Uhartediko parke nazionala | |
|---|---|
 | |
| Kokalekua | Palma Mallorcakoa, Espainia |
| Koordenatuak |   Cabrera Uhartediko parke nazionala Cabrera Uhartediko parke nazionala (Espainia) |
| Azalera | 907,94 km² eta 91.420,31253 ha |
| Izendapena | Parke nazional, naturagune babestua, Espainiako parke nazional eta Uhartedi |
| IUCNren babesa | II. maila: parke nazional |
| Sorrera | 91-04-29 eta 1991 |
| Bisitari-kopurua | 95.604 |
| Webgunea | http://reddeparquesnacionales.mma.es/parques/cabrera/index.htm |
Cabrera Uhartediko parke nazionala (gaztelaniaz: Parque nacional marítimo-terrestre del Archipiélago de Cabrera; katalanez: Parc Nacional Maritimoterrestre de l’Arxipèlag de Cabrera) Espainiako parke nazionala, Balear Uharteetako Autonomia Erkidegoko Cabrera uhartedian kokatua. Itsaso eta lehorrekoa da, eta horixe da era horretako bakarra. 1991n sortu zen eta 10.021 hektareako eremua du; horietatik 1.836 lehorrean daude, Cabrera, Conills, Plana, Redonda eta Forada uharteetan. Baina itsasoko faunaren aberastasuna da eremuari garrantzia ematen diona.
Historia
Gorabehera handiak izan ditu gaur egun parkea denak bere historian zehar. Bertako uretan hondoratuta dauden feniziarren, kartagotarren eta erromatarren ontziek erakusten dute oso trafiko bizia izan zuela garai batean, eta, lehorrean, XIV. mendean eraikitako gaztelu batek portu txikiaren sarrera zaintzen du. Piraten atsedenleku eta monasterio txiki baten kokagune, 1808an, Independentziaren gerra garaian, Bailengo borrokan preso hartutako 9.000 frantsesen presondegi izan zen. 1973-1987 bitartean Espainiako armadaren tiro-eremua izan zen eta azkenik, parke nazional egin zuten 1991n.
Ezaugarriak
Klima eta landaredia mediterraneoak ditu. Aleppo pinuzko basoak baldin baditu ere, basolibondoz eta sastraka xerofiloz osatutako makia da nagusi. Faunari dagokionez, hegaztiak dira ugarienak, eta 150 mota inguru daude sailkaturik: ubarroiak, arrano arrantzalea, Eleonor belatza, belatz handia, belatz gorria, txinboa eta Audouinen antxeta, besteak beste. Bertakoa da, bestalde, sugandila beltza ere, inguru hartako lehorreko animalia ugariena.
Itsasoaren hondoan ura oso gardena da eta posidoniazko larreak eta koral harriak ikus daitezke. Faunari dagokionez izurdeak, zereak, kaxaloteak, dortokak (morea, berdea eta laut dortoka) eta 200etik gora arrain eta oskoldun dago bertan.
Erreferentziak
- Artikulu honen edukiaren zati bat Lur hiztegi entziklopedikotik edo Lur entziklopedia tematikotik txertatu zen 2013-3-25 egunean. Egile-eskubideen jabeak, Eusko Jaurlaritzak, hiztegi horiek CC-BY 3.0 lizentziarekin argitaratu ditu, Open Data Euskadi webgunean.
Kanpo estekak
- Webgune ofiziala
| Autoritate kontrola |
|---|
Datuak: Q1968721
Multimedia: Cabrera Archipelago / Q1968721
