The New York Times

Artikulu honek erreferentziak behar ditu. Hemen erreferentzia egiaztagarriak gehituz lagun dezakezu.

The New York Times
NewYorkTimes.svg
Mota	Egunkari orokorra
Fitxa teknikoa
Lehen zenbakia	1851
Hizkuntza	ingelesa
Argitaratze lekua	New York Times Building, New York
Formatua	izara
Argitaletxea	The New York Times Company (en) eta A. G. Sulzberger (en)
Banaketa
Ekoizpen osoa	443.000 (2019) 1.122.400 (2000) 1.132.000 (2003) 1.103.600 (2006) 648.900 (2014)
Banatze-eremua	Ameriketako Estatu Batuak
Maiztasuna	Egunero
Salneurria	1,25 $
Historia
Sortzailea	George Jones eta Henry Jarvis Raymond
Editore-burua	Joseph Kahn (en)
Erredaktoreak	Joseph Kahn (en)
Identifikadoreak
ISSN	0362-4331, 1553-8095 eta 1542-667X
www.nytimes.com

The New York Times informazio orokorreko hedabide estatubatuar bat da. New Yorken sortu zen 1851n^[1], hiriko gertaeren berri emateko. 1980tik aurrera, izaera nazionala izaten eta herrialde osoko gaurkotasunari buruzko informazio zabalagoa eskaintzen hasi zen: AEBetako hedabide garrantzitsuena da, 132 Pulitzer sari irabazi baititu.^[2]

Gainera, egunkariak atzerrirako saltoa egin zuen 2009an^[2], nazioarteko bertsioa abiarazi zuenean. Edizio global horrek, hain zuzen, urte horretantxe jaso zuen International New York Times izena, baina International Herald Tribune du aurrekari. Gaur egun, 180 herrialdetan baino gehiagotan banatzen da^[3], eta nazioarteko egoitza Parisen du 1967tik geroztik. Bi egunkari bertsioak, eta baita bestelako hainbat eduki ere, New York Times Company enpresaren produktu dira, eta Arthur Ochs Sulzberger du presidente 1992tik geroztik.^[2]

Formatu originala paperezkoa da; handik abiatuta, euskarri digitaleko bertsioa 1996an abiatu zen^[2]. Webgune nagusiaz gain, eduki ugari beste hainbat gizarte sare eta euskarriren bidez ere eskaintzen ditu. Egunkaria ez ezik, hainbat gai ardatz dituzten magazinak ere biltzen ditu taldeak. Horien artean, Newsletter buletina.

NYTimes.com webguneak 150 artikulu argitaratzen ditu egunean, astelehenetik larunbatera, eta 250 inguru igandeetan. Danielle Rhoades Hak The New York Timesen bozeramaileak adierazi zituen datu horiek.^[4]

Edizio digitaleko edukiak hiru hizkuntzatan argitaratzen ditu, bertsio banatan: ingelesez, txineraz eta gaztelaniaz.

Irakurleak

Ez da Estatu Batuetan hartzaile gehien duen hedabidea, baina oso datu esanguratsuak ditu. Statista estatistika atariaren arabera, 9,34 milioi erosle inguru ditu AEBetan, bere edizio fisikoan, hiru hiletik behin. Azken neurketen arabera, ia 8,789 milioi harpidedun ditu mundu osoan zehar^[5], eta horietatik 1,85 milioi harpidedun digitalak dira.

The New York Times, gaur egun, bigarrena da Amerikako Estatu Batuetan eguneroko salmenta kopuruaren sailkapenean, egunean 2,1 milioi ale inguru saltzen baititu. Gehien saltzen duena, ordea, USA Today da, egunero 2,3 milioi ale saltzen baititu. Hirugarrena The Wall Street Journal da, 1,3 milioirekin.

Enpresa egitura

The New York Timesen enpresa argitaratzaileak New York Times Company du izena^[2]. Estatu Batuetako terminologian eta ingelesez, public company deritzo haren enpresa formari: sozietate anonimoaren baliokidetzat har liteke. Kasu horretan, public izenondoak ez du estatuaren jabetzarik adierazten: sozietate anonimoaren eredua jarraikiz, helburu ekonomikoak dituen enpresa da, eta akzioen arabera banatzen dira jabetza eta erantzukizuna, era proportzionalean, bazkideen artean.

New York Times Companyren akziodun nagusia Carlos Slim mexikar inbertsorea da, eta akzio gehien kontrolatzen dituen sozietatea Darsana Capital Partners da (% 9). Enpresa 1978ko martxoaren 31n burtsan kotizatzen hasi zen, eta egun 3.900 milioi dolarreko balioa du.

Prezio politika

The New York Times egunkariaren eduki fisiko eta digitalak osotasunean eskuratzeko, ordaindu behar da, eta harpidetzako aukerak eskaintzen dira. Harpidetzarik gabe, edizio fisikoak Europan 2 euroko prezioa du astegunetan, eta 6 eurokoa igandeetan, edizio handiena eta osatuena baita. Azken horretan elkarrizketa eta erreportaje sakon gehiago argitaratzen dira. Bestetik, hiru harpidetza digital mota eskaintzen ditu: Basic, All Access eta All Access Plus.

Online publizitateak gorakada handia izan zuen 2017an The New York Timesek. Azken hiruhilekoan % 11 igo ziren, eta 49 milioi dolarreko irabazi garbiak eman zituen. Publizitatea inprimatuak beherako joera nabarmena izan zuen, eta % 20 jaitsi. Hortaz, publizitatearen irabaziak ia % 10 jaitsi ziren, munduko hedabide gehienen joerarekin bat.

Azken urteotan, produktu fisikoen salmentan beherakada izan da, baina harpidetza digitalaren bidezko irabaziek gora egin dute, bestalde. 2017ko azken hiru hilabetean, 157.000 harpidedun digital berri lortu zituen, eta 2,5 milioiko zifrara iritsi. Horrek eduki digitalen bidezko diru irabaziak % 52 igotzea ekarri du, 96 milioi dolarrera iritsi arte.

Datuek bilakaera eta garapen positiboa erakusten dute: urte osoari erreparatuta, diru sarrerak % 8 hazi dira, 1,7 mila milioi dolarrera iritsita. Osotara, harpidetzak The New York Timesi ematen dion diru sarrera % 15 emendatu da, paperezko harpidetza ere barne hartuta.

Erreferentziak

Kanpo estekak

• (Ingelesez) The New York Times egunkariaren webgune ofiziala eta bertsio digitala

• Datuak: Q9684
• Multimedia: The New York Times / Q9684